হুজুগে আমরা হক্কল বৈতালী,
বাকিবকেয়ায় রমরমা ভাব ভূতের বেগার ঠেলি,
ভেলকিবাজি ভালা লাগে ধাপ্পাবাজের লগে গলাগলি,
হাচা কথা হুনলে আমরার কানো মারে তালি,
হুজুগে আমরা হক্কল বৈতালী।
কোনতা করার বল নাই করি গালা গালি,
লাটর সামনে পড়লে আমরা দুইও হাত মলি,
তেলাল মাথাত তেল দেই হক্কলটিনতর ট্যাঁকখালি।
কামে কাজে বড়লোকি মেজাজ দেখাই করি ফুটানি,
নিজর পিন্ন কাপড় নাই পরর তেনাত ধইরা টানি,
কাম কাজ ভালা লাগে না আমরা হারা জীবন করি টানাটানি,
নেতা ওইবার লাগি মারামারি আমরার মাঝে খালি দলাদলি।
নিজে করলে হক্কলতা ঠিক অন্যে করলে ভুল ধরি,
ভালা করতা পারি না মন্দ করার লাগি আগে থাকি,
নিজর থালে রউর কল্লা না পাইলে করি ফুলা ফুলি,
কেউর থোড়া ভালা ওইলে নাক উঁচা করি আমরা দিন রাইত জ্বলি।
